“Nnamdi Kanu arrest in Nigeria”: Ipob ‘Nnamdi Kanu dey arrested’, go appear for court

"Nnamdi Kanu arrest in Nigeria": Ipob 'Nnamdi Kanu dey arrested', go appear for court - Malami

Wia dis foto come from, Other

Nnamdi Kanu don chop arrest and dey charged to court in Nigeria.

Kanu, di leader of di ban Indigenous People of Biafra, arrest happun on Sunday.

Justice Minister Abubakar Malami say dem don repatriate alias return Kanu to Nigeria.

“We want to inform Nigerians say goment working with security agencies don succeed in attempt to gbab Nnamdi Kanu and we don bring back come Nigeria.”

Malami tell tori pipo for Abuja, di kontri political capital, on Tuesday Afternoon.

“Kanu go still answer for di 11 charges wey e bin dey face for court before e try to escape justice and we don already re-present before court.”

Wia dis foto come from, Elliot Ugochukwu-Ukoh

“Security agencies arrest Kanu on di 27th of dis month (Sunday) and as I dey tok to you e dey on im way to court.” Malami add.

Short after Malami address tori pipo on Tuesday, Federal High Court for Abuja order di detention of Ipob leader Nnamdi Kanu for DSS facility until July 26 wen im trial go start.

Justice Binta Nyako give di order after Nigeria goment present am before court to face im 11 count charge against am.

Kanu arrest dey come at a time wey di separatist dey dey ginger more of im followers to breakaway from Nigeria to form Biafra land.

Wia dis foto come from, Other

Wetin we call dis foto,

Nnamdi Kanu on 29 June, 2021 after im arrest and return to Nigeria.

“Nnamdi Kanu arrest in Nigeria” background:

Federal High Court for Abuja Nigeria for March 2019 order di arrest of di leader of di Indigenous People of Biafra.

Dat time Nnamdi Kanu arrest order na on top accuse of treasonable felony.

Justice Binta Nyako say di trial of Kanu wey don fail to appear for court since April 25, 2017 without any explanation go begin even if im dey absent.

Di judge base im decision on provision of section 352 (4) of di Administrative of Criminal Justice Act, 2015.

Kanu lawyer oga Ifeanyi Ejiofor been oppose di prosecuting counsel, Magaji Labaran oral application.

Ejiofor ask di court to give am more time to explain why im client never appear for court. But di court no gree dat time.

Wia dis foto come from, Getty Images

Wetin we call dis foto,

Nnamdi Kanu bin disappear for September 2017 wen e still get case for court.

For January 2018 Federal High Court for Abuja, Nigeria troway case wey Indigenous People of Biafra (IPOB) bring to free Kanu.

Ipob dat time bin say dem want make di court to order then Chief of Army staff, Tukur Burutai to release dia leader, Nnamdi Kanu.

Tori be say, at some point confusion bin dey about di whereabouts of Nnamdi Kanu after e disappear afta im bin get bail in April, 2017.

Na Enyinnaya Abaribe and two oda pipo na im bin stand as surety for di IPOB leader bail dat time.

At som point court ask Senator Abaribe, Immanuel Shalum Okabenmabu and Tochukwu Uchendu to explain Nnamdi Kanu where about.

Wetin we call dis foto,

Justice Nyako tok say di trial must end one way or di other.

Nnamdi Kanu profile

Nnamdi Kanu bin form IPOB for 2012 and many believe say dem be breakaway branch from MASSOB wey Ralph Uwazirike establish for 1999.

Di Nigerian goment don declare IPOB as terrorists group and ban dia activities

Di agenda of IPOB na for di south -east to break away from Naija to form dia own kontri.

For 2017 after court grant am im dis appear alias escape from Nigerian authorities.

By 2020 Nnamdi Kanu form Eastern Security Network [ESN].

Kanu form ESN to provide internal security against herders invasion of farmlands for di Igbo speaking south-eastern region of Nigeria.

Mazi Nnamdi Kanu [as many of im followers dey call am] bin dey relatively figure until 2009.

Na for 2009 Kanu start Radio Biafra, one online radio station wey dey campaign for an independent state for mainly Igbo speaking pipo of Nigeria.

Kanu Radio Biafra dey broadcast to Nigeria from London.

Though im grow up in Nigeria south-east.

Kanu attend University of Nsukka, later move to di UK before graduating.

Soon after setting up Ipob in 2014, e begin speak to gatherings of large Igbo diaspora, calling for Biafran independence.

Inside some of Kanu comments, im beg Biafrans to take up arms against di Nigerian state.

In recent times Nigeria police don blame most attacks across di southeast on di ESN security outfit wey IPOB leader Nnamdi Kanu set up.

For February 2021, social networking site, Facebook comot alias delete di verified account of Nnamdi Kanu from dia platform.

Dis ban happun after one live broadcast wey di leader of di Indigenous People of Biafra [Ipob] do 2 February.

During di Facebook live, Kanu accuse cattle herders say dem destroy farms for im native regions.

Facebook tell BBC say dem comot di account because of “repeated violation of dia rules on harm and hate speech.”

Wia dis foto come from, Getty Images

Since afta di 1967 Nigerian civil war popularly known as di “Biafra War” many groups don dey agitate for di Igbo speaking part of Southern Nigeria to go dia separate way.

Diis groups include di Indigenous People of Biafra [IPOB] and di Movement for Actualization of Sovereign State of Biafra [MASSOB]

Di immediate cause of di recent agitation for Biafra inside Nigeria start from di 19 October, 2015.

Dat na wen dem arrest of Nnamdi Nwannekaenyi Kanu, leader of Indigenous People of Biafra, [IPOB], by di kontri secret police Department of State Services [DSS].

Nnamdi Kanu na di director of Radio Biafra, one unlicensed station wey dey crusade for violent struggle to achieve independence for Biafra inside Nigeria’s south east.

Charges against Kanu include sedition, ethnic incitement and treasonable felony.

Some of dis offences carry heavy penalties, from long jail terms to death sentence.

Those wey dey agitate bin dey primarily demand him freedom, but also call for di restoration of Biafra as an independent kontri.

As at today Biafra no dey exist as a unit or form of goment inside Nigeria and di separatists no dey clear about how dem see di territory of di “new Biafra”.

Some claim say e go include all areas wey di Igbo pipo, including parts of di oil-rich Niger Delta ,wey Asari-Dokubo from, to di south and Benue state to di north.

But di oda pipo of dis regions dem don oppose di plan to include dem inside any new Biafra, according to International Crisis Group Nigeria analyst Nnamdi Obasi.

Oda separatists say a restored Biafra go dey limited to five core Igbo states – Abia, Anambra, Ebonyi, Enugu and Imo – also known as Nigeria “South East Zone”.

We still dey put eye for dis tori, make you dey refresh dis tori for more.


Leave a Reply

This website uses cookies. By continuing to use this site, you accept our use of cookies.  Learn more